Abian da Mugaz gaindiko Uda Ikastaroen bigarren edizioa

2023ko uztailaren 17tik 26ra izango da Baionan

• Mugaz gaindiko Uda Ikastaroak 2022an sortu ziren, Akitania Berria-Euskadi-Nafarroa Euroeskualdeko unibertsitate publikoen lankidetzari esker, eta mugaz gaindiko tokiko agintarien laguntzarekin.
• Lehenengo edizioaren arrakasta ikusita, aurten, 12 proposamen izango dituen programa askotariko bat proposatu da.
• Matrikula doakoa da eta egoitza nagusia Cité des Arts unibertsitate eskola izango da, baita Atalante kultur zentroa ere (biak Baionan daude). Gainera, Saltillo eskola-ontzian itsasaldi bat egingo da, eta herritarrentzako irekitako jarduera bat egingo da geldialdi bakoitzean, Santurtzin, Bilbon, Mutrikun, Donostian eta Donibane Lohizunen.

Gaur aurkeztu da Baionan Mugaz Gaindiko Udako Ikastaroen bigarren edizioa. Antolakuntza-batzordeko kide guztiek hartu dute parte ekitaldian, eta, ordezkari gisa, honako hauek hartu dute hitza: Jean-René Etchegaray, Euskal Herria Hirigune Elkargoko presidenteak, Eider Mendoza, Gipuzkoako Foru Aldundiko Diputatu Nagusiak, Mathieu Bergé, Akitania Berria-Euskadi-Nafarroa euroeskualdeko Kontseilari Delegatua, Eva Ferreira, UPV/EHUko errektoreak eta Itziar Alkorta, UPV/EHUko Uda Ikastaroen zuzendari akademikoak.

Mugaz gaindiko Uda Ikastaroak erakunde hauen lankidetzaren emaitza dira: l’Université de Bordeaux (UB), Euskal Herriko Unibertsitatea (UPV/EHU), UPV/EHUko Uda Ikastaroak Fundazioa, l’Université Bordeaux Montaigne (UBM), l’Université de Pau et des Pays de L´Adour (UPPA), Nafarroako Unibertsitate Publikoa (UPNA/NUP), Euskampus Fundazioa eta CNRS/IKER zentroa. Halaber, mugaz gaindiko tokiko erakunderen babesa dute: Gipuzkoako Foru Aldundia, Communauté d’Agglomération Pays Basque eta Akitania Berria-Euskadi-Nafarroa Euroeskualdea eta erakundeena. Aurten, Maison des Sciences de l’Homme de Bordeaux (MSH Bx) zentroak bat egin du proiektuarekin.

Lehenengo edizioak agerian utzi zuen oso eraginkorra dela kulturarteko eta eleaniztuna den ezagutza zabaltzeko gune estrategiko eta nodo gisa, eta erakutsi zuen mugak gainditzeko gaitasuna duela ezagutzak partekatu eta topaketa-sareak sortzeko xedean, epe labur, ertain eta luzera aukera eta proposamen berriak ekar ditzaten. Mugaz gaindiko Uda Ikastaroak mugaz gaindiko herritarrei, ikaslego eta mundu akademikoari zuzendurik daude eta agerian jarri nahi dute unibertsitateek eginkizun proaktibo bat dutela ekonomia-, gizarte- eta lurralde-arloan kohesionatuagoa dagoen mugaz gaindiko gune bat sortzeko orduan, Europako mugaz gaindiko beste eremu batzuetan lortu den moduan.

Programa honen xedea da parte hartzen duten unibertsitate eta erakunde zientifikoetan sortutako ezagutza zabaltzea, bai eta erakunde publikoen plan estrategikoak hedatzea ere, Euroeskualdean ezagutzan oinarritutako ekonomia bat garatze aldera, zeinak berrikuntza eta teknologia berriak balio erantsia sortzeko tresna katalizatzaile gisa kokatuko dituen.

Ikastaroetako hizkuntzak Euroeskualdeko hiru ofizialak izango dira (euskara, frantsesa eta gaztelania), baita ingelesa ere, eleaniztasunaren eta kulturartekotasunaren balioa azpimarratzeko. Aurrez aurre egingo dira eta, gainera, programazioaren zati bat online ikusi ahal izango da zuzenean. Lurraldearekin lotutako zenbait jarduera kultural eta ireki barne hartuko dituzte.

Edizio hau 2023ko uztailaren 17tik 26ra bitartean izango da eta 12 ikastaro izango ditu:

 

IKASTAROA	EGUNA	ZUZENDARIAK	TOKIA
Euskal Eurohiria: mugaz gaindiko herritarrentzako laborategi europarra	Uzt. 17	Ander Arzelus	Cité Des Arts
Adimen artifizialaren erronkak segurtasunaren eta justiziaren ikuspegitik: diziplina anitzeko eta mugazgaindiko ikuspegiak	Uzt. 17	Céline Teyssier	Cité Des Arts
Bideojokoen mugaz eta nazioez gaindiko analisia: Erabilerak, interakzioak eta aholkularitza	Uzt. 17	Yannick Hernández	Cité Des Arts
Saltillo eskola-ontzia	07/17 07/26	Itziar Rekalde Julieta Barrenechea	Santurtzi, Bilbo, Mutriku, Donostia, Donibane Lohizune
Lurralde-garapen solidarioa, antolaketa- eta lege-moduak eta lurraldearen zerbitzurako lankidetza	Uzt. 18	Fabienne Pinos Xabier Larralde	Cité Des Arts
Euskal diaspora: mugaz gaindiko irteeratik Amerikako integraziora (Euskal Herria, Estatu Batuak, Latinoamerika, XIX-XXI. mendeak)	07/18 07/19	Isabelle Tauzin	Cité Des Arts
Europaren integrazioa Frantziaren eta Espainiaren arteko mugan: mugaz gaindiko ikuspegia	Uzt. 18	Ihintza Palacin	Cité Des Arts
Hezkuntza etorkizuneko jendartea kohesionatzeko tresna: euskal curriculumaren ber-irudikatzea	Uzt. 19	Nora Salbotx	Cité Des Arts
Klima-aldaketa eta lurraldea. Ikuspegi geografikoa	Uzt. 20	Itziar Aguado	Cité Des Arts
Muga eta paisaiak	Uzt. 20	Hélène Larralde	Cité Des Arts
Mugak gainditzeko hezkuntza eta ikerkuntza proposamenak: haur eta gazteen parte hartzea sustatzen	Uzt. 21	Nahia Idoiaga	Cité Des Arts
Zinema Ipar Euskal Herrian. Urrats bat aurrera?	Uzt. 21	Josu Martinez	Cité des Arts

 

Ipar Euskal Herriko zinemaren egoerari buruzko saioaren barruan, horretan parte hartu duten zenbait hizlarik zuzendutako bost film labur emango dira.

Ikastaro horiez gain, bost jarduera ireki programatu dira Saltillo eskola-ontzian egindako itsasaldiaren esparruan:

Portuko uren ingurumen-zaintza.

 

Portuko uren ingurumen-zaintza.	Uzt. 18	Portugalete	Nautika eta Itsasontzi-makineria Goi Eskola Teknikoa UPV/EHU
Mutrikuko ammonoideoak: duela 100 milioi urteko ozeano-ondarea.	Uzt. 20	Mutriku	Zabiel Kultur Etxea
Donibane Lohizuneko badiako itsaspeko mapa arkeologikoa. Ondare ikusezin bat aurkituz.	Uzt. 22	Donibane Lohitzune
Zientziaren, herritarren zientziaren eta aktibismoaren arteko elkarrizketa: plastikoek eragindako kutsadura murriztea, erronka komun baterako proiektu partekatuak.	Uzt. 24	Donostia	Miramar Jauregia
Zaharberritzea eta itsas ondarea eta zaharberritze-tailerra.	Uzt. 26	Bilbo	Itsasmuseum

Matrikula eta informazioa

Ikastaro bakoitza hasi arte eman ahal izango da izena. Izen-ematea doan da.

Informazioa eta matrikula: www.uik.eus