Herri txikiak aurrera begira: energia burujabetzarako ideiak, ekimenak eta balioak

Energiaren burujabetza erronka zentrala da gure gizarteetan, XXI. mendeko larrialdi klimatikoari aurre egiteko trantsizio ekologiko eta energetikoaren markoan. Herri txikiei ere zuzenean eragiten dien gaia da hau, baina herri txikiek badituzte zenbait ezaugarri bereziki kontuan hartu beharrekoak: landa eremuan egotea, ingurunearekin harreman ezberdina izatea, kultura landatarra, baso eremuak edukitzea, mugikortasunerako irtenbide kolektiboen mugak, biztanleria talde txikiak, etxebizitzen nolakotasuna, auzolaneko kultura... Asko eta oso modu ezberdinetakoak dira energiaren erronkei erantzuteko herri txikietan kontuan hartu beharreko ezaugarriak eta baldintzak. 

Uda Ikastaro honetan, aurreko urteetako bideari jarraituz, herri txikien etorkizunari begira jarriko gara, baina energia arloan burujabe izateko erronka handiari berariaz erreparatuz. Begirada horretan, ordea, alde inmateriala (kultura, balioak, auzolana...) bereziki azpimarratu nahi da, irtenbide teknikoei eta materialei ez ezik, komunitateen baitako balio eta kulturei trantsizio energetikorako duten ezinbesteko papera aitortuz. Horretarako, ikastaro honetan herri txikietako balio eta ezagutzari buruzko hausnarketak energiari buruzko ezagutza konkretuekin uztartuko dira, eta Euskal Herriko herri txikietako esperientzia aurreratu eta eredugarriak aurkeztuko dira aurrera begirako eztabaida eta gogoeta kolektiboan sakontzeko.