Kriminologia eta Feminismoa: Delinkuentziarako hurbilketa genero ikuspegitik

Kriminologiak, gizarte eta lege zientzia gehienek bezala, ikuspegi androzentriko batetik ikertu ditu delitugileak, delitua eta biktimak. Hau da, kriminaltasunaren eboluzioari eta delitugileen premia kriminogenoei buruzko ikerketa gehienak gizonengan egin dira, eta, era berean, prebentzio eta esku  hartze programak eta emakumeekin egindako ikerketa asko genero rolaren eta estereotipoen birsorkuntzan oinarritu dira. Ikastaro honetan, kriminologia feministaren eta teoria kriminologikoen sorrera eta eboluzioa aztertu nahi dira, genero ikuspegi batetik.

Emakume delitugileek jasaten duten kondena bikoitza (eta hirukoitza emakume migranteen eta ijitoen kasuan) oinarri hartuta, emakumeen delinkuentziari eta emakumeen espetxeei buruzko zeharkako eta kulturarteko ikuspegi bat eskainiko zaie ikasleei. Era berean, emakume delitugileekin prebentzioan eta esku hartzeetan lanerako erabil daitezkeen tresnak eskainiko dira, arreta berezia jarriz emakume migranteengan eta gutxieneko etnikoetako kideak diren emakumeengan.