Transformation, Adaptation and Mitigation for a 1.5 degree Global Warming

Aurten 2010eko uztailean hasi zen BC3-UPV/EHU Summer School on Climate Change delakoaren 10. edizioa egingo dugu. Lehenengo aldi hartan nazioarteko komunitatea Kyotoko Protokoloaren oinordeko izango zen akordio baten bila zebilen, 2009an proposaturiko Kopenhageko akordio ez loteslearen ostean. Ordutik, Udako Eskolak gai sorta zabala estali du, diziplina arteko ikuspegi batetik, eta hurbiletik jarraitu die klima aldaketari buruzko nazioarteko negoziazioei. Duela bi urteko Udako Eskola azkenik Parisko Akordioa ekarri zuen nazioarteko politiken formulazioan gertaturiko paradigma aldaketaren atzean zeuden faktoreetan zentratu zen. Orduan, AEBetako gobernuak akordioa atzera botatzeko hartutako erabakiak “ziurgabetasun klima” bat sortu zuen, eta hura izan zen iazko edizioaren gai nagusia. Aurten pizgarri bat du eztabaidak, Nazio Batuen Erakundeko Klima Aldaketari Buruzko Gobernu Arteko Taldearen (IPCC) txosten historikoa, 2018ko urrian argitaratua, zeinetan argi geratzen den ezinbestekoa dela hurrengo 12 urteetan premiazko neurriak hartzea planetaren berotzeari gehienez 1,5ºC-tan eusteko, ingurumen ondorio eta ondorio ekonomiko katastrofikoak saiheste aldera.

Azken urteetan gero eta argiago ikusi dugu ekoizpen eta kontsumo eredu eta politiken ondorioz munduko ekonomia planetaren muga ekologiko kritikoak zeharkatzen ari dela, eta gizarte, ekonomia eta erakunde trantsizio garrantzitsuak gauzatu beharko direla. Berotzeari heltzeko aldaketa bizkor eta funtsezko baten gero eta behar handiagoak eraldatze kontzeptua jarri du mahai gainean. Erronkaren eskala itzelak Trantsizio handia eta Eraldaketa handia bezalako terminoak sorrarazi ditu, baina gizarte eragile biziki anitzek ez dute oraindik aldaketa horiek ekarriko eta eskatuko dutena ulertzeko modu bakar bat partekatzen. Hala, Udako Eskolaren lehenengo egunak gure pentsaera zabaltzen eta trantsizioei zein pertsonak bizi diren modua eraberritzeak eta klima egonkortzen laguntzeak berekin dakarrenari buruzko elkarrizketa abiarazten lagunduko du.

Nazioarteko komunitate zientifikoak azken urteetan ikasi duen lezioetako beste bat da arreta berezia jarri behar zaiela klima aldaketak hirietan dituen ondorioei, baita arintze eta egokitze arloan planteatzen dituzten erronka eta aukerei ere. Adostasuna hain da zabala arlo horretan, ikuspegi berezi hori IPCCren VI. Ebaluazio txosteneko prozesu guztietan egongo dela, eta klima aldaketari eta hiriei buruzko txosten berezi bat txertatuko dela VII. ebaluazio txostenean (2023-2028). Hala, Udako Eskolaren bigarren jardunaldiak hirietako egokitze estrategiei helduko die.

Azkenik, Udako Eskolaren hirugarren eta azken eguna arintzeko tresnen aukeraketan, eta arintzeko politika azeleratuen diseinuan eta aplikazioan zentratuko da, betiere helburua munduko tenperaturaren igoera 1,5 ºC-ra mugatzeko helburuz.