Fisika kuantikoa: txigorgailutik ordenagailura

Fisika kuantikoak naturari buruz dugun ikuspegia aldatu du eta funtsezko zutabe bat izan da teknologia garatzeko, mende batean baino gehiagoan. Oraindik ere gu harritzeko gaitasuna du eta, gaur egun, ezagutza berritzaileak eta aplikazio eraldatzaileak ematen jarraitzen du.

Hitzaldi honetan, hasteko, labur gainbegiratuko ditut aurkikuntza eta fenomeno kuantiko nagusiak, bai eta aplikazio nabarmenenak ere.

Horien artean, transistorea eta mikroelektronika gailentzen dira;

izan ere, horiei esker dauzkagu ordenagailuak eta mugikorrak. Bestalde, laserra aipatu behar da, funtsezkoa baita komunikazioetan, materialen prozesaketan eta kirurgian, besteak beste.

Jarraian, sentsoreen, komunikazioen eta konputazioaren arloetan aplikazio berriak garatzeko aurrez aurre ditugun erronkak jorratuko ditut. Era berean, nazioarteko eta tokiko egoerari buruzko ikuspegi bat emango dut. Testuinguru horretan, UPV/EHUk EHU Quantum Center zentroaren bidez prestakuntzaren, ikerkuntzaren eta teknologia-transferentziaren arloan egin duen ekarpen handia azpimarratuko dut.